“அத்தம “தேசிய வேலைத்திட்டம் வலிகாமம் மேற்கு சங்கானை பிரதேச செயலர் பிரிவில் பொது மக்களின் சிறப்பான பங்களிப்புடன் இடம் பெற்றது.
இந்த தேசிய வேலை திட்டத்தின் மூன்றாவது நிகழ்வு இன்று சனிக்கிழமை (31.10.2026) காலை 8 மணிக்கு சகல கிராம அலுவலர் பிரிவுகளிலும் ஆரம்பிக்கப்பட்டது.
இந்நிகழ்வில் பிரஜாசக்தி தலைவர்கள் மற்றும் உறுப்பினர்களும் கலந்து கொண்டு ஒத்துழைப்பு வழங்கி இருந்தமை குறிப்பிடத்தக்கது
சம நேரத்தில் மற்றைய 25 கிராம அலுவலர் பிரிவுகளிலும் இந்த திட்டம் ஆரம்பித்து வைக்கப்பட்டது.
இந்த திட்டத்தில் வீதிகள், குளங்கள், வாய்க்கால்கள், பாடசாலைகள், முன்பள்ளிகள், பொது மண்டபங்கள்,உட்பட பல இடங்கள் சுத்தம் செய்யப்பட்டதுடன் மரம் நடுகையும், டெங்கு களத்தரிசிப்புக்களும் இடம்பெற்றன
காலை 8 மணிக்கு ஆரம்பிக்கப்பட்ட மேற்படி நிகழ்வில் பிரஜாசக்தி தலைவர்கள், பொதுமக்கள் ,பொது அமைப்புக்கள் ,நலன்விரும்பிகள் உட்பட பலர் கலந்து கொண்டு சிறப்பான பங்களிப்பினை வழங்கினர்.
"அத்தம " தேசிய வேலை திட்டத்தில் பிரதிதிட்டமிடல் பணிப்பாளர், திருமதி இலக்கியா ஜெயகரன், நிர்வாக கிராம அலுவலர், சமுர்த்தி தலைமை முகாமையாளர், சமுர்த்தி மகாசங்க முகாமையாளர், வட்டுக்கோட்டை வங்கி முகாமையாளர் கிராம மட்ட உத்தியோகத்தர்கள் குறிப்பாக சமுர்த்தி அபிவிருத்தி உத்தியோகத்தர்கள் மற்றும் பிரதேச செயலக உத்தியோகத்தர்கள் கலந்து கொண்டு தமது பங்களிப்பை வழங்கி இருந்தமை குறிப்பிடத்தக்கது.
